Vrasesit e Azem Hajdarit

Nën masa të forta sigurie gjykata e Tiranës shpalli sot vendimin e saj në seancën e fundit të proçesit"Hajdari".

Jaho Mulosmani, i akuzuari kryesor për vrasjen e deputetit të PD-së, Azem Hajdari, u dënua me burgim të përjetshëm, dënim maksimal, sipas kodit penal shqiptar, ku nuk egziston dënimi me vdekje.

Me heqje lirie, u dënuan edhe tre vëllezërit Haxhia, përkatësisht: Ismeti me 20 vjet burg, Isamedini me 2.5 vjet burg.

Ndërsa Izet Haxhia, ish-bodigardi i ish- presidentit, Berisha, u dënua me 25 vjet burg në mungesë. Gjykata shpalli të pafajshëm ish-komisarin e policisë së Tropojës,Fatmir Meta.


Me shumë interes në sallën e gjyqit, u prit deklarimi i trupit gjykues rreth motivit të vrasjes.

Opozita për tre vjet rresht kishte thënë se vrasja kishte qënë politike, por trupi gjykues tha sot se deputeti i opozitës u vra në 12 shtatorin e 1998-ës, për hakmarrje.

Proçesi gjyqësor për vrasjen e Azem Hajdarit, filloi një vit më parë, ndërsa sipas opozites, ishte lënë mjaft kohë për likujdimin njëri pas tjetrit, të të dyshuarve të tjerë, si pjesëmarrës në vrasjen e tij.

Azem Hajdari ishte një nga figurat kryesore të politikës shqiptare të viteve '90. Ai u vu në krye të lëvizjes studentore të dhjetorit 90, që çoi në përmbysjen e komunizmit në Shqipëri.

Hajdari u zgjodh drejtëpërsëdrejti nga populli si deputet i Kuvendit të Shqipërisë në të gjitha votimet pluraliste pasardhëse.


http://www.bbc.co.uk/albanian/020429121607.shtml


Hajdari”, vetëm 3 të dënuar


D.B

TIRANË- Vrasja e deputetit të Partisë Demokratike, Azem Hajdari, më 12 shtator të vitit 1998 është cilësuar si vrasja e shekullit, ndërkohë që gjykimi i kësaj çështjeje ka vazhduar për 70 seanca në Gjykatën e Tiranës për të dënuar 4 bashkautorët, njëri prej të cilëve i vdekur. Për vrasjen e Hajdarit, Gjykata e Tiranës ka dënuar me burgim të përjetshëm Jaho Mulosmanin, i cilësuar si organizatori dhe ekzekutori kryesor, së bashku me Fatmir Haklajn, i cili ishte vrarë në Tropojë. Ndërkaq, është dënuar me 25 vjet burg në mungesë Izet Haxhia, me 20 vjet Ismet Haxhia, ndërsa dy të pandehurit e tjerë, Isamedin Haxhia dhe Fatmir Meta janë shpallur të pafajshëm. Vendimi i gjykatës shpalli edhe motivin e vrasjes së Hajdarit, që deri atëherë ishte enigmë. Sipas gjykatës, Azem Hajdari nuk është vrarë në cilësinë e deputetit, por për hakmarrje. I vetmi i dënuar që mundi të largohej ishte Izet Haxhia, i cili u arrestua dje në Antalia të Turqisë për llogari të policisë shqiptare.



04/06/2006
KATEGORIA: Kronike nga Tirana