Sekretari përgjithshëm i OKB Ban Ki Moon

15/06/2007 - 13:23
• Sekretari përgjithshëm i OKB tha se plani i Ahtisaarit është një dokument që ende në mënyrë aktive po shqyrtohet nga vendet anëtare të Këshillit të Sigurimit

Nju Jork- Sekretari i Përgjithshëm i Kombeve të Bashkuara, Ban Ki Moon ka ritheksuar edhe njëherë mbështetjen e tij të plotë për planin Ahtisari dhe në mënyrë indirekte edhe për një pavarësi të mbikëqyrur për Kosovën.

Në pyetjen se a do të krijonte një bllokadë në zgjidhjen e çështjes së Kosovës një veto e mundshme ndaj planit Ahtisari, sekretari përgjithshëm tha se është një dokument që ende në mënyrë aktive po shqyrtohet nga vendet anëtare të Këshillit të Sigurimit. "Nuk do të doja të bëj ndonjë koment tani për tani, sepse duhet të presim dhe shohim si do të veprojë Këshilli i Sigurimit. Siç e kam thënë edhe më parë, unë i jap një mbështetje të plotë rekomandimeve të dërguarit tim të posaçëm", tha Ki Moon.

Ndërkaq, kur është fjala tek rezoluta mbi Kosovën që në themel do të mbështesë rekomandimet e Ahtisaarit, zyrtarët amerikanë kanë theksuar se ata duan që për të të votohet javën e ardhshme në Këshillin e Sigurimit në New York. Sipas burimeve në Kombet e Bashkuara, tanimë ekzistojnë edhe votat e nevojshme për miratimin e saj nga anëtarët e Këshillit të Sigurimit, natyrisht me kusht që Rusia të mos përdorë veton. rtk